Keppnisskilmálar

Forkeppni bikars er innanfélagsmót kvenna og karla. Mótsfyrirkomulag er þannig að forkeppni verður spiluð fyrst og er punktamót með forgjöf. Þeir 32 keppendur sem ná bestum árangri með forgjöf í forkeppninni taka síðan þátt í holukeppni með forgjöf, með útsláttar fyrirkomulagi, þar sem keppt er einn gegn einum um titilinn Bikarmeistari GÖ. 1. sætið spilar við 32. sæti (16. sæti), 2. sæti við 31 (15. sæti) sæti og svo framvegis (sjá viðauka 1, bls. 163 í Golfreglur í gildi frá janúar 2016). Keppendur í holukeppni koma sér saman um hvenær þeir leika sína leiki en þurfa að ljúka leik í hverri umferð fyrir gefnar dagsetningar.  Á lokamóti GÖ fær sigurvegari holukeppninnar, Bikarmeistari GÖ, afhentan bikar til varðveislu í eitt ár.

Forkeppnin er punktamót þar sem hæsta gefin forgjöf er 24 hjá körlum og 28 hjá konum. Karlar spila af gulum teig og konur af rauðum. Þeir karlar sem eru 70 ára og eldri mega spila af rauðum teig og reiknast þá forgjöf miðaða við þá teiga. Þátttökurétt hafa félagsmenn GÖ sem hafa löglega stjörnumerkta forgjöf samkvæmt forriti GSÍ.

Í holukeppninni með forgjöf (hæsta gefin forgjöf er 24 hjá körlum og 28 hjá konum) ræður forgjafartafla Öndverðarnesvallar því á hvaða holum annar keppandinn fær aukahögg í forgjöf. Spilað verður eftir 3/4 af mismun forgjafar keppenda (ef mismunurinn á forgjöf er 5 þá eru 3/4 af því 3,75 sem hækkar upp í 4 og er þá mismunurinn 4 í forgjöf, ef mismunurinn á forgjöf er t.d. 3 þá eru 3/4 af því 2,25 sem lækkar niður í 2 og þá mismunurinn 2 í forgjöf). Ímyndum okkur að Óli keppi við Siggu í holukeppni. Óli er með 12 í leikforgjöf á vellinum þar sem þeir kljást og Sigga er með 8 í leikforgjöf. Mismunurinn er 4 högg (og ¾ af því eru 3 högg) og Óli fær því eitt högg í forgjöf á þeim holum sem eru merktar nr. 1 – 3 eftir forgjöf á skorkortinu.

Hafi golfarar ekki lokið leik innan tímarammans eiga þeir að mæta til leiks síðasta daginn kl. 14:00. Mæti aðeins annar keppandi er litið þannig að á að sá sem ekki mætir gefi leikinn. Kappleikjanefnd getur án fyrirvara fellt niður leiki í umferðum hafi keppendur ekki lokið leik og skilað úrslitum í golfskála (sjá nánar: Hafi golfarar ekki lokið leik).

Forgjöf keppenda sem þeir spila samkvæmt og gildir í leiknum er sú forgjöf sem keppandi er með á leikdegi.

Kappleikjanefnd

Bikarkeppni GÖ 2017

Bikarkeppni GÖ 2017