Staðarreglur Golfklúbbur Öndverðarness 2025

1. Vallarmörk eru hvítar stikur, hvítar línur, girðing til hægri á 1. braut og girðing til vinstri á 2. braut. Einnig gildir að malbikaður vegur að golfskála afmarkar vallarmörk á brautum 7, 16, 17 og 18. Ávallt skal miða við þá brún malbiksins sem liggur nær brautinni sem er verið að spila.

2. Eftirtalið er hluti vallar:

a. Allir grjótgarðar og grjóthleðslur. Ef hreyft er við steinum fær kylfingur almenna vítið. b. Dæluhús hægra megin á 8. braut og íbúðarhús á 9. og 18. braut.

3. Eftirtaldir hlutir eru óhreyfanlegar hindranir sem lausn er veitt frá skv. reglu 16.1:

a. Hælar sem merkja vítasvæði. b. Ofanáliggjandi vatnslagnir, vatnskranar og vökvunarbúnaður og borholustútar á 8. braut. c. Fjarlægðarstikur, vegvísar, brautarmerkingar og auglýsingaskilti við og á teigum. d. Jarðfastir steinar og berar klappir, á snöggslegnu svæði á almenna svæðinu. d. Ruslatunnur, bekkir og kúluþvottavélar. e. Hleðslustöðvar fyrir sláttuvélar og raflagnir tengdar þeim.

4. Hreyfanlegar hindranir. Lágar girðingar og skilti til að stýra umferð á almenna svæðinu og skilti sem merkja fallreiti.

5. Færslur á brautum. Þegar bolti leikmanns liggur innan almenna svæðisins og þar sem gras er slegið í brautarhæð eða neðar má leikmaðurinn taka vítalausa lausn einu sinni áður en högg er slegið með því að færa boltann innan einnar kylfulengdar þaðan sem boltinn liggur (regla 14.1), þó ekki nær holunni og ekki utan almenna svæðisins. Þegar lausn er tekin skv. þessari reglu verður leikmaðurinn að velja stað til að leggja boltann og fara eftir aðferðum við að leggja bolta aftur skv. reglum 14.2b (2) og 14.2e.

6. Fallreitir. Bolta þarf að láta falla innan fallreits og hann þarf að stöðvast innan hans.

7. Vítasvæði. Sé vítasvæði merkt með rauðum hælum í háu grasi, miðast vítasvæði við sláttur röndina á háa grasinu.

a. Lendi bolti í vítasvæði aftan við 1. og 3. flöt má fara á næsta fallreit gegn einu vítahöggi. b. Lendi bolti í vítasvæði við 11. teig og 16. teig má fara í fallreit gegn einu vítahöggi.

8. Grund í aðgerð. Öll athafnasvæði á leið og rót eftir vallarstarfsmenn á almenna svæðinu eru grund í aðgerð (óeðlilegar vallaraðstæður). Leita skal lausnar skv. reglu 16-1b. Nýlagðar grasþökur, jarðrask og framkvæmdir eru grund í aðgerð og er heimilt að leita lausnar skv. reglu 16-1b.

9. Ef jarðvegsdúkur truflar legu bolta eða stöðu leikmanns í glompu, er leyfð færsla sem nemur einni kylfulengd innan glompu, leggja skal boltann, þó ekki nær holu.

10. Ef sláttuvél færir til bolta skal leggja boltann aftur á upprunalegan stað.

11. Kylfingar skulu kynna sér umgengnis- og leikreglur til að bæta leikhraðann og halda golfvellinum í sem bestu ástandi.

Tímabundin staðarregla: Þegar bolti liggur á flöt má færa hann um allt að einn púttershaus einu sinni fyrir hvert högg, en ekki nær holu.

Víti fyrir brot á staðarreglu, almennt víti. Holukeppni, holutap. Sími dómara í mótum 779 3380. Í gildi frá 4. júní 2025.